نسوة كافيه موقع يُعنى بشؤون المرأة اللبنانية
انتقد الشيخ عباس حطيط أجواء شاطىء بحر صور، وقد نشر على صفحته على فيسبوك، مجموعة من صور النساء اللواتي يلبسن ملابس البحر (المايوه)، وعلّق بالتالي:
“#صور_من_شواطئ_جبل_عامل #اليوم !!!
اعتذر من الإخوة والاخوات المؤمنين والمؤمنات ومن كل محافظ على شرفه من أي دين كان على عرضي لهذه الصور المعروضة اليوم في “موقع يا صور” عن حال شواطئ صور في #جبل_عامل هذا اليوم . إلا أن قبح السكوت عن هذه الكارثة الإجتماعية في هذه البقعة -التي كانت تعد مفخرة التشبع العلوي والعفة الفاطمية ومركز حوزات بلاد الشام- يساوي أضعاف قبح نشرها على صفحتي !!
لا اهتمام بشؤون الناس الإقتصادية، لا اهتمام بشؤون الناس الأخلاقية والثقافية، لا اهتمام بما وصلت إليه العلاقات الإجتماعية من تمزق وتفكك أسري مقيت، لكنك ترى المتزعمين لمجتمعنا يتنطحون لكل شاردة وواردة في أقاليم الأرض، وهم أعجز من أن يعملوا على ستر بنات مجتمعهم في قلب “جبل عامل” العظيم الذي باتت شواطئه وشوارعه لا تختلف كثيرا عن شواطئ وشوارع أوروبا وأمريكا .. وإسرائيل !!
سؤالنا هو :
#علام_تقاتلون ؟!! ”
وقد أثار منشوره ضجة واسعة على صفحات مواقع التواصل الإجتماعي، حتى وصلت مشاركته إلى حوالي ألف مشاركة عبر “فيسبوك”، جميعها وجهت له نقداً قاسياً وسخرية مما كتبه، وقال علي الأمين: ” يا مولانا في ناس بلا اكل و الدولار مدري اديش، حليب الأطفال انقطع يا مولانا و من يومين غتصبو طفل عمرو ١٣ سنة و الوضع (…) يا حبيبي كل واحد حر نحن بلبنان بدنا نسكر و نسهر ونروح عالبحر نشوف النسوان و من بعدا نحنا على جهنم دغري مافي إسكال خيي اذا حابب تشهر حالك ضوي عالمواضيع المهمة و اتركولنا المايوهات” .
وقالت غنوة منصور: ” يا الله خلص شو الكن بالعالم مين لبس مايو ومين شلح، الفايسبوك اللي حضرتك عامل اكاونت عليه كمان للامركان والصهاينة،شو بدكن تقمعو العالم انتو ؟؟؟؟ كل حدا حر لحالو وبمعتقدو وبحياتو .. بدكن تمشو العالم متل ما بدكن” .
أما جويس الياس علقت قائلة: “صور مدينة متنوعة ومنطقة سياحية ما فينا نمنع الناس ونفرض عليهم شي وما خصنا بالناس، وإنتَ مش منيحة منك تنشر هيك صور إحتراماً لعمامتك وزيَّك الديني، لأن حتى النشر فيه إشكال شرعي. إذا كُنت تعلم وفعلتُها مُصيبة، وإذا كُنت لا تعلم وأنتَ رجل دين مُصيبة أكبر. تاركين كلشي ووضع البلد كلّو ولاحقين العالم يلّي عالبحور؟ كمان شرف وعرض الناس وأديان الناس مش لعبة لساعة ما بدو الواحد بيطلع بيحكي عنّن! ومش نحنا يلّي منحاسب الناس ومنفتي من راسنا. طبعاً منظر الصبايا على البحر بالمايوه بتحرِّك غريزتك حضرة “الشيخ”. بس معقول مشهد إغتصاب طفل عمروه ١٣ سنة ما حرَّك ذرَّة من عقلك؟ ” .
بينما ماريانا طحطح، قالت: ” انا ما استوقفتي الّا ما منختلف عن شوارع اسرائيل !!!! هيك منصير منشبه اسرائيل !! خلينا نلتفت انّو ارض جبل عامل قلبها كبير و بتحتوي غيرنا كمان .. و ما فينَا نفرض على حدا شي و البحر مش حكر على حدا … ارض جبل عامل مش ح توقف ع هيك … عنجد خلصنا عيب !
وقالت خديجة جركس: “دخلك شو رأيك يا شيخ باغتصاب طفل عمره ١٣ سنة، شو رأيك يا شيخ بمنظر الناس يلي عم تضطر تاكل من الزبالة؟شو رأيك يا شيخ بمنظر طوابير الخبز ؟شو رأيك يا شيخ بمنظر مقايضة الاشياء الشخصية على كيس حليب او كيس حفاضات ؟شو رأيك يا شيخ بالدولار صار ب ١٠،٠٠٠؟ كيفك فيها هي ؟#تجار_الدين ” .
أما علي خنافر، قال: “شيل عينك عن النسوان وبلا بصبصة يا مولانا ”
وقال حسن جوني: ” عباس انت عايش معنا بلبنان؟ زعجك المايو و ما زعجك كل الي عم بيصير بلبنان من جوع و فقر و انهيار اقتصادي و فساد و و و ..؟ ”
وقالت ليلى جفال: “الله ع اخلاقك يا فخر العرب 😂😂😂 شو دخلك انت ولك بالعالم من انا وعمري سنة بعرف انو الصليب ما منروح علي كرمال هالمشاهد 😂 انت بدك تقنعنا انك مش عارف انو الصليب هيك. ومين سامحلك تقيم العالم اساسا عليك بحالك يا بو الاخلاق و ما حدا جابرك تروح عهيدا الشاطئ في غيرو كتير بناسبك ”
وقالت ليلى شغري: “شيخنا ما زعجوا منظر الناس عابواب الفرن ولا منظر الناس عند الصيارفة بس منظر الناس عالبحر بالمايو طلعو من دينو حبيبي فيك ما تنزل عالبحر وما تفتح مواقع بتحط صور ناس عالبحر هيدي صور يا عمري ملتقى الآراء والمعتقدات اذا مش عاجبك هاجر ” .
وقال باسل الحسيني: ” عباس حبيبي .تركت الجوع و الظلم و العطش و لا كهرباء و لا حياة و سلب و نهب من كبار الزعماء في الدولة .و بيت مال المسلمين بيتوزع لنسوان و اولاد الحاكم و رحت تنزل صورة لشعب (….) عم يتنفس على البحر، بس الظاهر غريزتك قوية مش قادر تسيطر عحالك.مش بهيدي الطريقة بكون دين محمد مش بهيدي الطريقة بتكون عبادة ربك. الحق مش عليك الحق على يلي اكبر منك يلي لبسك عمامة و قلك روح يا مكبوت احكي باسم الدين”.
وقال قيصر فاضل: “هذا الشيخ يبصبص على النساء وبنفس الوقت ينتقد ويقدم وصلا مزورا مختوما باسم الله”.
وقال أنيس نعمة:” بشو بالك يا شيخ !!!؟؟ الناس هم بتموت جوع. المحلات والمؤسسات سكرت، اكتر من نص العالم بلا شغل او بنص معاش
كهربا ما في. وتقنين باشتراك المولد لمن استطاع السه سبيلاً، الشمع انقطع وصار ب ١٤ الف. لو بتهاجروا أنتو والسياسيين العما بسماكم ”
وقالت مي فرحات: ” احكام مزريه آسفه .. بس منطقه صور وضواحيها منطقه مختلطه .. يعني فيها من كل الأديان .. ما فيك تحصرها بقوانين ديانه واحده: .
وقال عباس الطويل: ” الشيخ شكله ولا مرة زاير بحر صور او شايف صُور من هونيك صور مدينة التعايش”
وقالت ريم الشامي: “مولانا حب يأمر بالمعروف وينهي عن المنكر ويستنكر عرض اجساد الفتيات على الشواطئ، قام عرضن هو ليحكي عن الموضوع.. بعتقد دور رجال الدين لازم يتجسد بنشر الخير بين العالم، والتوعية وتسليط الضوء على امور أسمى من هيك بكتير (فينا اذا شي نحكي عن اغتصاب الولد يلي عمرو ١٣ سنة)، ولكن من الواضح انو كل سنين العلم والدورات الدينية يلي اخدتوها ما تركت فيكن بصمة اخلاقية تخليكن تتركوا العالم بحالها وخاصة البنات”.
وقالت بتول بزي: “انك تاخد صور لناس وتعرضهم تحت اسم الدين والأخلاق اضرب من الفاحشة بحد ذاتها!!!! هيدي فئة من الشيوخ اللي كرهوا العالم بالدين! ما حدا يجي يقلي امر بالمعروف ونهي عن المنكر لان مش هيك ابدااا!! عدا عن هيك يا ريت شفناك عم تحكي عن الدولار والفقر والعالم الجوعانة كان احسن من هيك مواضيع ما الها قيمة!!! ” .
وقال أحمد نصر الله: ” امتين بدنا نخلص من هالنماذج لرجال الدين؟ ولك العالم ميتي جوع وانت لاحق هالسخافات هاي!! ”
وقال هادي الشيخ حسين: “يا عمي شو قصة سماكن !لك شو هالفضاوة البال لعندو هالشيخ ! لك شو إلك مع سما العالم إنت مين عطاك الحق تصنف الناس بهالطريقة النمطية المقيتة؟لك نحن بعدنا ضمن ” الجمهورية اللبنانية” أو أعلنها الشيخ إمارة و معناش خبر؟! لك إستحليتك بهالوضع (…) يا شيخ تستغل منبرك لتشهر بشي حرامي شي ناهب لخيرات الناس و مستقبلها و حاضرها ، شي واحد متعدي عالشاطئ فعليا سارقو يعني ..عنجد يعجز اللسان عن وصف القعر الذي وصلنا له و بعدن عم يبحشو نزول..لا و قاعد بيحكي باسم جبل عامل كمان مين حطك مطوع عسمانا ولو خيي؟! ”
وقال عباس عطية: “حبيبي الشيخ، انشر صوَر الحرمان و الذل و الفقر بمنطقة “جبل عامل” وانشر صوَر يلي سالب و سارق منطقة “جبل عامل” هيدا الأهم ” .
(نسوة كافيه)
